„Servas, Ernstl!“
„Servas, Gustl, oide Haut!“
„Huck di hea, da Nazl kummt heit net.“
„Wos is mit dem, hota scho wida Hausarrest von seiner Oidn ausgfosst?“
„Ha, ha, na sche warats, hots eam auftuttlt in da Hockn.“
„Wos hota dn gmocht, des Potschal??“
 
„Wos deafsn sei fia di, Gustl, des übliche?“
„Servas Mizzl, heit nua an Pfiff fia mi.“
„Wo is los Gustl, bist kronk, miss ma uns Sorgn mochn?“
„Haha, na is nua Spass, wann i amoi nur an Pfiff sauf kennts mi noch Steihof fian!“
„A so a Pleampl, oiso a Kriagl fian lustign Hean.“
„No sicha, mei Bia is jo net deppat, ha, ha.“
 
„No, Gustl, heit wiada an Klaun gfriastickt?“
„Na, oba a kloane Geburtstogsfeia in da Budn. A poa Sekt mit Oblsta zum Fuaglian.“
„Do host a Masn, bei mia sans olle trukn, die Chefs, feian nur mit Opflsoft gschpritzt.“
„De gschpritztn Piefke san a boid iberoi.“
 
„Des Kriagl fia lustign Hean, Prost.“
„Gschamsta Dina, Mizzl, bring ma glei des nächste, wast eh, ko net so koit saufn.“
„Kummt glei, Gustl. Fia di a no ans, Ernstl?“
„Na sicha, sixt eh, hob nur mehr an woaman Honsl.“
„Na do woi ma di net fadurschtn lossn, kummt glei, Ernstl!“
 
„Sog, wos woa jetzt mit dem Nazl?“
„No de schenan Kollegn hom eam einetheatert.“
„Wos, scho wida? Wos woa deamoi?“
„Na wast, sans olle in da Kuchl gschtondn beim Tschikn. Do kummt die Friedl fuabei.“
„De Tippsn von sei Chef?“
„Jo, eh. Auf de steht a se, sei Oide geht eam eh scho am Zaga. Des wissn a de Kollegn.
Sogt da Franzl zu eam:
 „Wüstas net zum Firmen-Gschnas eilodn?“
Sogt da Nazl:
„Jo, eh, oba i trau mi net.“
Sogt da Franzl: „Geh, die steht eh a auf di. Geh hi!“.
Sogt da Nazl: „No guat, I probiers.“
Wü ia da Nazl im Gong nochrenna, schaut oba zua de Kollegn zruck und rennt wia deppat in des offane Gongfensta. Des Fensta schewwat wia Kluppnsackl und den Nazl prackts hi am Oasch.
De Nosn bliat wia deppat.
„Geh schleich di!“
„Jo, eh. De Gfrasta Kollegn kudan wia deppat, oba de Friedl rennt zu eam zuwe und kewlt: „Es Pleampln hoits ma an Gschiafetzn!“. Da Franzl kumt mitn Fetzn und die Friedl druckt dem Nazl den Fetzn ins Gsicht.“
„De oame Sau!“
„Na long wora net oam, wäu die Friedl hot eam eigsacklt und in ia Zimma mitgnumma.“
„Geh schleich di!“
„Jo, und jetzt schauns olle deppat, wäu da Nazl hot grod a Rendevouz mit da Friedl.“
„No hot dea a Masn! Oba so a Potschal wia dea is, huckta muagn eh wieda bei uns.“
„Haha, und mit no ana bluatign Nosn fo seina Oiadn!“
„Haha, na mit dera wiadat I mi a net olegn!“
„Na don a Prost aufn Nazl, de oame Sau!“
 
„So des näxte Kriagl fia die Herrn.“
„Passt, Mizzl, bist de beste.“
„Woi bekummts, es Trangler.“
„Hot de grod Trangler zu uns gsogt?“
„Haha, wos Recht hot, hots recht!“
„Geh schleich di!“

0